Amos fè n ri jouk tèt nou pati
Depi kilè tèt nou pati ? Depi kilè nou panse nou konn tout bagay ? Kijan nou fè imajine kretyen pa ka fè nou ri ? Erezman, Amos fè yon “move”, Amos aji.
Se te dimanch 6 dawout, nan “Le Villate” kay Petyon, kote yon ekip bèl moun (sof misye) tap pran plezi tande vwa Néhémie Bastien, pandan yo tap tann atis jounen an pou ITIYA 2.0, yon ide orijinal Amos César pou rakonte sou yon ton komik pwoblèm ki genyen lè meteyorit la touche tè Dayiti.
Anpil griyen dan, anpil kè kontan, chak blag yonn pi bèl pase yon lòt, devan yon piblik ki pat vini fè lòt bagay pase bat bravo ak griyen dan. Men tou, te gen rezon pou nou te aplodi. Wi, Amos aji ak anpil talan. Mekanisyen eklere, papa espirityèl plen pouvwa, nan yon peyi kote tout doulè se gaz, yon ti bout tè Bondye kreye pou kretyen ki sanble twò renmen Satan. Wi, Amos aji pou li montre defo anpil nan nou. Siw pa sanwont, lè w fin ri, ou dwe korije.
Piblik la pat menm vle ale, tèlman yo te vle toujou. Men tout bèl bagay gen yon fen, tankou tèks sa a. Agapao te la pou kouvri tout bagay. Nou pa ka baw son, paske nou pat ka filme, men imaj kè kontan yo la, pou yon bèl souvni.
PS: M ta di w sa ITIYA vle di, men wap rele m tèt pa dwat.
Fok ou di sak Itiya wii
Ala bèl tèks